Prumme tat .. op Kölsch

8. März 2019 | Von | Kategorie: Allgemeines

tat (dät) luter möglichs unopfällig.

Prumme wor ene Höösch, ene Meister, sich unopfallig zo maache.

Prumme joov et eigentlich överhaupt nit.

Grad em Augebleck dät Prumme sich unger de Warteschlang vör däm stadtbekannte Back-huus mische, sing suwiesu bloß 172 Zentimetere op Liliputformat schrumpele, et Base-käppche noch e bessche deefe in sing Mondgeseech, trok an dä geföhlt zentnerschwere blau Ikeatäsch. Dät dat Gepäckstöck zweschen de Schoche  verschwinde loosse un däute et met lutter Küühmjerei zentimeterwies no vüür. Do an de Thek hatt at widder ene Käufer tüntelig sing War gepack un de Nüsele en et Portemannee gefummelt.

Prumme dät links linse, rähts luure, dät selvs  no hinge piele durch de Panorameschieve ohne wirklich de Kopp zo driehe. Drusse wor jet wie e Schmeersportfess am tobe. Tatütata, zuckend Blauleech, Motorräde däre knattere, Reife quietsche, Minsche in blaue Klamotte rannte schinns ohne Ziel eröm, däte us Streifewage titsche, widder erenn hechte.

Do hätt einer vür en halve Stund en Bank üvverfalle, dät sich dä Klaaf verbreite. Mieh wie en halve Million. Mindestens. Absolute Profi.

Prummetaat, Appeltaat, alles weed Zaldat gemaat,“ summte dä Härm hösch met dä Kapp, wie sie de Deile en Amerika nenne, die se beim Baseball op’m Kopp han, wenn se net grad schmieße oder schlage oder fange oder sich de Bein en de Liev stonn. Wat he keine Minsch spellt. E paar Zentimeter no vörre met dr Täsch en dr Schlang.

Oven dropp en dr Täsch log et Mett. Prumme dät tireck wie hä us de Bank kom watt geplant wor: En Kapp op dr Kopp und dat Dinge deev en et Geseech trecke. Un Mett en de Metzgerei koofe. Et Wassser wor em ald widder ens en de Muhl zosamme geloofe. Ölleg hatt hä noch doheim, och Peffer un noch e bessche Salz als Krönung.

Domals, hä woss nit mieh wann genau, hatt hä zoersch en Kapp vom FC angehatt. Die hatt hä en ener Weetschaff an de Zöllecher Stroß vom Pluutehoke genomme. Esu hatt hä bei de Grö-ne opgeschlage. Die wore alldemolde vom Ömverteile am schwaade. FC, hatte se gepröttelt, de Kapitalistesäu! Wolle em Grönsgöödel et Stadion usbaue! Un kein Anderseröm en de Mannschaff! He geht eckersch en FC Sankt Pauli-Kapp! Ävver se gove em suwiesu nix, keine Cent. Dot moht hä selvs anpacke und fing dat Dinge met dä Banke an. De nächste Kapp wor ein von de Haie, obwohl hä sich för Eishockey gar nit interessiere dät. För Fußball und Baseball och nit.

Stoisch wor de Schlang sich em Schnecketempo no vörre am schiebe, angetrocke vom betö-rende Döff von gebackene Kossbarkeite.

Prumme wor dran.

„Wat darf et dann sin, de Här?“, dät e Persönche em weiße Kiddel fläute. ‚Net hetze, bin neu he’ los Prumme irritiert op däm Häubche en den Hoor.

„Äj, eja, e Pund Schwatzbrud. Zehn Röggelcher de luxe. Un – en ganze Prummetaat. Met Rohm“, dät hä luusch ordere, leckte sich de Leppe und karessierte övver dat proper gefüllte Säckche.

Genau en dem Fupp dät ene Blaukiddel de Laade stürme. Sich met getrockene Waff dörch et Gewöhl kämfe no vürre vür de Thek und blöke: „PRUMME! Endlich han ich dich, do Hanack!“

„Se sen gar nit dran! Freesigkeit!“ dät ein met ener spetze Naas sabbele, trot dä Poli mit dem Birkenstock-bewaffnete Foß widder et Schinnbein, rammte  ene säbelschärpe Elleboge in sing Rebbe.

„Typisch Macho! Einfach vürdrängele und mir de letzte Prummetaat fottschnappe! Nit mit mir! Ich ben dran!“

Prumme dät op der Stell schalte. Dat Dörchenein notzend, dät hä de Prummetaat packe, se dem Uniformierte en de Visage klatsche und schoss us däm Geschäff, esu flöck, wie et dr Büggel zoleeß. Över däm Blaue wor ungerdesse en Well us en et Wanke gerodene Liever zosamme gebroche.

„Schudderhohn!“ brüllt dä eine.

„Mömmesfresser!“ gov sei retour.

„Freckig Freese!“ blöök dr eine.

„Dönerdrießer!“ ne andere.

„Fiese Pattevuggel!“

„Ahl Schabrack!!

„Merkelgeseech!“

„Düs-sel-dor-fer!“

ging dä Knaatsch.

Dat Seniorepärche nevenan am Stammplatzdesch tirek neven dä Thek hatt de Lusterhoonde op “Ovendfridde” gestellt, wie se den dat Backes kome und däte op de Szenerie hinger Odem met Argusdöppe un vürgereckte Häls lustere, esu wick wie de Brelleglasere reiche däte.

„Ävver gefälligs met Sahne“, juchzte  de weibliche Hälvde von dem alääte Duo, et Drautche, en Art Trude Herr för Ärme, dät met vill Genuss ene neue Happe Prummetaat eravv schlecke un singe Rollator zielgenau en dä Tumult ramme, wobei ihre Plääte-Begleiter, dr Schäng, em Veedel och jenannt Knubbelefutz, nörgelte: „Un met Zimp un Zucker, do Tuppes!“ und meddels singe Gehhilfe, dat heeß Krücke, met ener wohre Engelsmien en janze Herd von Chaosteilnehmere op e Fott falle leet. „Dat es wie fröher Dilledopp spelle.“

„Esu wohr wie ich Pinkus Schwutz heeße, dich zick 20 Johr jage und en drei Woche en Pension jonn: PRUMME, do bes dran! Hättste besser ding Mask net grad vür dr Metzgerei ustrecke dürfe Futzemann,“ rief dr Poliziss hinger däm Flüchtige her, met vill Möh Rohm zosamme met Taat aus Schnäuzer un Auge am klaube.

Prumme tat, us dem Backes entkomme, widder betont höosch un unopfällig, en däm Dürch- enein von de Schmär kei Problem. Selvs bei ‚Aktenzeichen XY’ woodt hä ‚Fantomas’ ge- nannt. Hä trok de Kopphörer övver alle zwei Uhre un trendelte met enem fruhe Leedche op de Leppe elans de Sülzburgstroß.

Hätt jo ald widder ens geflupp. Äver Dunnerknispel, gribbelte hä, woröm hät dä Bankfuzzi zosätzlich zo dä Schingche noch Münzrolle eren gepack? Hatt hä doch für singe wirklich allerletzte Ömverdeiler, esu nannt hä sing Raubzög, ald de Strategie gewechselt. Sing Leev-lingsbank wor de Sparda. Die Lumpe hatten en övver de Uhre gehaue met dr Hypothek för dr gruße Wohnwage. Drei Zemmer, Köch, Bad, Balkon. Als Nächste wor jetz de Deutsche dran. Von wäge Peanuts. De Bin-Laden-Mask hatt johrelang Entsetze, Schess und Schrecks verbreidt, bes singe Aanbleck bei einer Huh-Schwangere spontan Wihe usgelüüs hat. It fing an, wie am Spieß zo blöke, wodrop hin die ressliche Wiever en dat Kreischkonzäät enstemme däte, alledwil dä Lihrjung em Glaskaste en Ohnmaach feel.

Beim vürletzte ‚Ömverdeiler’ wor hä dann met ene Andrea-Nahles-Mask komplett op et Föttche gefalle. Wie se dä fett grinsende Quadratheenskaste soche, hatten Bänker wie Kunde sich halv kapodd gelaach un en met Spröch wie „He gitt et blooß Mindesluhn! Schnapp dr doch de Rent met 23!“ jejujax, dä Stoppe derart verunsechert, dat hä op dr Stell ald widder Rießus genomme hatt. Wie hatt hä och blooß op dat bedressene Zuppehohn komme künne? Dr verhinderte Baalmillionär hatt wochelang Prummetaat bloß schnäuse künne und durch de Finsterschiev genieße müsse. Wegen dä Fählschläg kunnt hä sich esu jet nit leiste.

Lang hatt hä geschwank. Wor en de SPD gegange. Als Martin Schulz verkleid. Dä dät en irgendwie an ein Figur us em Kölsche Hännesche erinnere. De komische Brill, de usselige Bart und de halve Pläät. Der geborene Prediger vun de soziale Gerechtigkeit. Dat wor se neu Idol: En et Europa-Parlament flitze, en de List eintrage, widder avvhaue, Sitzungsgeld für dr ganze Dag kassiere. Ich han en dr Schull och nix geliert. Op ich Bürgermeister von Würsele werde kann? hat hä de Genosse gefrog. Die hatte vielleich geluurt!

Hüggig deute de Hartgeldrolle op en Joschka-Fischer-Mask zosamme met dä zopasse Pistol Marke Glock, mahte et Wiggerkumme en Plog. Hä woss, dat dr opgeblose gröne Schwaad-lappe esu e Pistölche em Taxi gefahre hatt, wie dr Minister Kary us Hesse öm de Eck gebraht wood. Esu muss sich dr Zintekloos ohne Rendiere föhle, stöhnte hä. Egal, dr Fluchtplan wor klor. En dr gelve blaue Ikeatäsch hat hä en eröm gedrihte blaue gehatt. No’m Nippes konnt hä für et ierste nit mieh, ävver zom propere Campingmobil hinger em Sibbegebirg. Wo keine froge dät, wer mr wor oder woher mr kohm. Do kannte se bloß dr Mänes Schmitz us Quadrath-Ichendörp. Keiner wööd ein Rheinland-Pfalz no em sööke.

Em Zickzack hoppelte et Mannsbild met dä blaugelve Täschlanz et Trottoir, quer üvver drei Spure Luxemburger Stroß, öm e Fitzelche grad noch eran scheeßende Autos us em Wäg gegange. No’m Haupbahnhoff, do stond sing Kaar unger dr Milchtüt. Alles genau geplant.

Kächend (?)  wuchtete hä dat Gerät övver de Brüstung von de Bahnstreck un wood gleichsam hingerher getrocke. Op singem Mp3-Player gove grad AC/DC ihr Bess: “Highway to Hell”, op Kölsch “A3 noh Düss”.

De eranbrausende Bahn nohm Prumme genau esu winnig wohr wie esu manch eine junge Stromer em Studenteveedel.

„Pietät hin, Pietät her“, nostert dr Gerichtsmediziner en geschlagene Stund späder, „dat sieht us wie … Prummetaat!“

Schreibe einen Kommentar

Sie müssen eingeloggt sein, um einen Kommentar schreiben.